ദോഹ : ഖത്തർ അമീർ ശൈഖ് തമീം ബിൻ ഹമദ് അൽഥാനിയുടെ രക്ഷാകർതൃത്വത്തിൽ ആഭ്യന്തര സുരക്ഷാ-സേഫ്റ്റി വിഭാഗത്തിലെ ആഗോള പ്രദർശനമായ 'മിലിപോൾ ഖത്തർ 2026'-ന്റെ 16-ാമത് പതിപ്പ് ഒക്ടോബർ 20 ചൊവ്വാഴ്ച ദോഹ എക്സിബിഷൻ ആൻഡ് കൺവെൻഷൻ സെന്ററിൽ (DECC) ആരംഭിക്കും. ആഭ്യന്തര മന്ത്രാലയത്തിന്റെ നേതൃത്വത്തിൽ സംഘടിപ്പിക്കുന്ന മൂന്ന് ദിവസത്തെ പ്രദർശനം ഒക്ടോബർ 22 വരെ നീണ്ടുനിൽക്കും. ലോകമെമ്പാടുമുള്ള പ്രമുഖ സുരക്ഷാ ഉദ്യോഗസ്ഥരും വിദഗ്ധരും ഈ മേളയിൽ പങ്കെടുക്കും.
മിലിപോൾ ഖത്തർ കമ്മിറ്റി ചെയർമാൻ മേജർ ജനറൽ നാസർ ബിൻ ഫഹദ് അൽഥാനിയും, മിലിപോൾ നെറ്റ്‌വർക്ക് ഡയറക്ടർ കാരൻ ഗൽസ്റ്റ്യനും ചേർന്ന് നടത്തിയ വാർത്താസമ്മേളനത്തിലാണ് ഇക്കാര്യം അറിയിച്ചത്. സ്പോൺസർമാരുടെ പ്രതിനിധികളും മാധ്യമപ്രവർത്തകരും ചടങ്ങിൽ സന്നിഹിതരായിരുന്നു.
പ്രദർശനത്തിനുള്ള ഒരു പൂർണ്ണമായ തയ്യാറെടുപ്പുകൾ കഴിഞ്ഞതായി മേജർ ജനറൽ നാസർ ബിൻ ഫഹദ് അൽഥാനി വ്യക്തമാക്കി. 23,000 ചതുരശ്ര മീറ്റർ വിസ്തൃതിയിൽ നടക്കുന്ന ഈ വർഷത്തെ മേളയിൽ 270-ലധികം പ്രാദേശിക-അന്തർദേശീയ കമ്പനികളും ഏഴ് അന്താരാഷ്ട്ര പവലിയനുകളും പങ്കെടുക്കുന്നുണ്ട്. കൂടാതെ ആഭ്യന്തര മന്ത്രാലയത്തിന്റെ വാഹനശേഖരം പ്രദർശിപ്പിക്കുന്നതിനായി ഒരു ഔട്ട്ഡോർ ഏരിയയും ഒരുക്കിയിട്ടുണ്ട്. ഏറ്റവും പുതിയ സുരക്ഷാ സാങ്കേതികവിദ്യകളും പരിഹാരങ്ങളും മനസ്സിലാക്കാനും, പരസ്പര സഹകരണം ശക്തിപ്പെടുത്താനും ഈ പ്രദർശനം വേദിയാകും.പ്രദർശനത്തോടനുബന്ധിച്ച് 'ദോഹ ഇന്റർനാഷണൽ കോൺഫറൻസ് ഓൺ എഐ ആൻഡ് സെക്യൂരിറ്റി'യും നടക്കുമെന്ന് അദ്ദേഹം കൂട്ടിച്ചേർത്തു. പ്രദർശനത്തിന്റെയും കോൺഫറൻസിന്റെയും വിജയത്തിനായി പിന്തുണ നൽകിയ എല്ലാസ്പോൺസർമാർക്കും അദ്ദേഹം നന്ദി അറിയിച്ചു.
1996-ൽ ഫ്രാൻസിന് പുറത്ത് ആദ്യമായി മിലിപോൾ പരമ്പര ആരംഭിച്ചതുമുതൽ ഖത്തർ ആഭ്യന്തര മന്ത്രാലയവും മിലിപോൾ ഖത്തറും തമ്മിലുള്ള ദീർഘകാല പങ്കാളിത്തം മിലിപോൾ നെറ്റ്‌വർക്ക് ഡയറക്ടർ കാരൻ ഗൽസ്റ്റ്യൻ എടുത്തുപറഞ്ഞു. കഴിഞ്ഞ മൂന്ന് പതിറ്റാണ്ടുകളായി തുടർച്ചയായി പങ്കെടുക്കുന്ന കമ്പനികളെ ആദരിക്കുന്നതിനായി ഈ വർഷം ആദ്യമായി '30-ാം വാർഷിക അവാർഡുകൾ' നൽകി ആദരിക്കുമെന്നും അദ്ദേഹം കൂട്ടിച്ചേർത്തു.
